Latinski jezik/Lekcija/četvrta: razlika između inačica

Gallia est omnis divisa¹ in partes tres, quarum² unam incolunt Belgae, aliam³ Aquitani, tertiam qui ipsorum⁴ lingua Celtae, nostra Galli appellantur⁵. Hi⁶ omnes lingua, institutis, legibus inter se⁷ differunt⁸. Gallos ab⁹ Aquitanis Garumna flumen, a⁹ Belgis Matrona et Sequana dividit. Horum omnium¹⁰ fortissimi¹¹ sunt Belgae, propterea quod a cultu atque humanitate provinciae longissime absunt, minimeque ad eos mercatores saepe commeant atque ea quae ad effeminandos animos pertinent important, proximique sunt Germanis, qui trans Rhenum incolunt, quibuscum continenter bellum gerunt. Qua de causa Helvetii quoque reliquos Gallos virtute praecedunt, quod fere cotidianis proeliis cum Germanis contendunt, cum aut suis finibus eos prohibent aut ipsi in eorum finibus bellum gerunt. Eorum una, pars, quam Gallos obtinere dictum est, initium capit a flumine Rhodano, continetur Garumna flumine, Oceano, finibus Belgarum, attingit etiam ab Sequanis et Helvetiis flumen Rhenum, vergit ad septentriones. Belgae ab extremis Galliae finibus oriuntur, pertinent ad inferiorem partem fluminis Rheni, spectant in septentrionem et orientem solem. Aquitania a Garumna flumine ad Pyrenaeos montes et eam partem Oceani quae est ad Hispaniam pertinet; spectat inter occasum solis et septentriones.